ଆଜିର ରାଶିଫଳ ୨୪ ଅକ୍ଟୋବର ୨୦୨୬: ଜାଣନ୍ତୁ ୧୨ଟି ରାଶିର ଭାଗ୍ୟଫଳ, ଶୁଭ ସମୟ ଓ ଅଶୁଭ ସମୟ

ନଜର ଓଡ଼ିଶା ଡିଜିଟାଲ ଡେସ୍କ: ଆଜି ଶନିବାର, ୨୪ ଅକ୍ଟୋବର ୨୦୨୬। ଭଦ୍ରକାଳୀ ପଞ୍ଜିକା ଅନୁଯାୟୀ ଆଜିର ତିଥି, ନକ୍ଷତ୍ର, ଶୁଭ ସମୟ, ଅଶୁଭ ସମୟ ଓ ୧୨ଟି ରାଶିର ଦୈନିକ ରାଶିଫଳ ବିଷୟରେ ଜାଣନ୍ତୁ। ମେଷଠାରୁ ମୀନ ପର୍ଯ୍ୟନ୍ତ କେଉଁ ରାଶି ପାଇଁ ଦିନଟି ଶୁଭ ରହିବ ଏବଂ କେଉଁ ରାଶିର ବ୍ୟକ୍ତିମାନେ ସତର୍କ ରହିବା ଆବଶ୍ୟକ, ପଢ଼ନ୍ତୁ ଆଜିର ରାଶିଫଳ।

ଆଜିର ପଞ୍ଜିକା: ୨୪ ଅକ୍ଟୋବର ୨୦୨୬

• ବାର: ଶନିବାର
• ଶକାବ୍ଦ: ୧୯୪୮
• ସମ୍ବତ୍: ୨୦୮୩
• ସମ୍ବତ୍ସର: ରୌଦ୍ର
• ମାସ: ଆଶ୍ୱିନ, ଶୁକ୍ଳପକ୍ଷ
• ତିଥି: ତ୍ରୟୋଦଶୀ, ଦିବା ୧ଟା ୩୬ ପରେ ଚତୁର୍ଦ୍ଦଶୀ
• ନକ୍ଷତ୍ର: ଉତ୍ତରଭାଦ୍ର, ରାତି ୮ଟା ୩୨ ପରେ ରେବତୀ
• ଚନ୍ଦ୍ର ରାଶି: ମୀନ
• ଯୋଗ: ବ୍ୟାଘାତ
• କରଣ: ତୈତିଳ
• ସୂର୍ଯ୍ୟୋଦୟ: ସକାଳ ୫ଟା ୪୩ ମିନିଟ୍
• ସୂର୍ଯ୍ୟାସ୍ତ: ସନ୍ଧ୍ୟା ୫ଟା ୧୩ ମିନିଟ୍

ଆଜିର ଶୁଭ ଓ ଅଶୁଭ ସମୟ

ବିଶୁଦ୍ଧ ଅମୃତ ବେଳା: ସକାଳ ୭ଟା ୨୫ରୁ ୯ଟା ୪୭ ମଧ୍ୟରେ, ଦିନ ୧୨ଟା ୧୦ରୁ ୧୨ଟା ୫୪ ମଧ୍ୟରେ ଏବଂ ଅପରାହ୍ନ ୨ଟା ୨୨ରୁ ୩ଟା ୨୨ ମଧ୍ୟରେ।

ବିଶୁଦ୍ଧ ମାହେନ୍ଦ୍ର ବେଳା: ରାତି ୨ଟା ୪ରୁ ୨ଟା ୫୨ ମଧ୍ୟରେ।

କାଳବେଳା: ସକାଳ ୭ଟା ୧୫ରୁ ଏବଂ ଅପରାହ୍ନ ୩ଟା ୪୮ରୁ ୫ଟା ୧୫ ମଧ୍ୟରେ।

ବାରବେଳା: ଦିନ ୧୨ଟା ୫୫ରୁ ଅପରାହ୍ନ ୨ଟା ୨୨ ମଧ୍ୟରେ।

ଆଜିର ୧୨ଟି ରାଶିର ରାଶିଫଳ

ମେଷ ରାଶି: ଆଜି ଦିନଟି ଶୁଭଫଳଦାୟୀ ରହିବ। ଶାରୀରିକ ଓ ମାନସିକ ସ୍ୱାସ୍ଥ୍ୟ ଭଲ ରହିବା ସହ ନୂଆ କାର୍ଯ୍ୟ ଆରମ୍ଭ ପାଇଁ ଅନୁକୂଳ ସମୟ ରହିଛି। ପରିବାର ସହ ଆନନ୍ଦରେ ସମୟ କଟିବ। ଧାର୍ମିକ କାର୍ଯ୍ୟରେ ଖର୍ଚ୍ଚ ହୋଇପାରେ।

ବୃଷ ରାଶି: କମ୍ ସମୟରେ ଅଧିକ ଲାଭ ପାଇବା ଆଶାରେ କୌଣସି ଭୁଲ୍ ନିଷ୍ପତ୍ତି ନିଅନ୍ତୁ ନାହିଁ। କୋର୍ଟ କଚେରୀ ସମ୍ବନ୍ଧୀୟ ବିଷୟରେ ସତର୍କ ରୁହନ୍ତୁ। ପରିବାରରେ ସୁଖଶାନ୍ତି ରହିବ। ନୂଆ କାମ ଆରମ୍ଭ କରିବାର ସୁଯୋଗ ମିଳିପାରେ ଏବଂ ଆକସ୍ମିକ ଧନଲାଭର ଯୋଗ ରହିଛି।

ମିଥୁନ ରାଶି: ସନ୍ତାନଙ୍କ ସମ୍ବନ୍ଧରେ ଶୁଭ ଖବର ମିଳିପାରେ। ପୁରୁଣା ବନ୍ଧୁଙ୍କ ସହ ସାକ୍ଷାତ ମନକୁ ଖୁସି କରିବ। ବ୍ୟବସାୟ ଓ ଆର୍ଥିକ କ୍ଷେତ୍ରରେ ଲାଭର ସମ୍ଭାବନା ରହିଛି। ମଧ୍ୟାହ୍ନ ପରେ କାର୍ଯ୍ୟ କରିବା ସମୟରେ ସତର୍କ ରୁହନ୍ତୁ।

କର୍କଟ ରାଶି: ବ୍ୟବସାୟ କ୍ଷେତ୍ରରେ ଉନ୍ନତିର ସୁଯୋଗ ମିଳିପାରେ। ଅଧିକାରୀଙ୍କ ସହଯୋଗ ଏବଂ ବୟୋଜ୍ୟେଷ୍ଠଙ୍କ ଆଶୀର୍ବାଦରୁ ଲାଭ ହେବ। ମଧ୍ୟାହ୍ନ ପରେ ବନ୍ଧୁଙ୍କ ସହ ମିଳାମିଶା ଓ ସାମାଜିକ କାର୍ଯ୍ୟରେ ସମୟ ବିତିପାରେ।

ସିଂହ ରାଶି: ଅଧିକାରୀଙ୍କ ସହ କଥାବାର୍ତ୍ତା ଓ ବ୍ୟବହାରରେ ସଂଯମ ରଖନ୍ତୁ। ବ୍ୟବସାୟରେ କିଛି ବାଧା ଆସିପାରେ। ତେବେ ମଧ୍ୟାହ୍ନ ପରେ ପରିସ୍ଥିତି ଅନୁକୂଳ ହେବା ସହ ଆର୍ଥିକ ଲାଭର ସମ୍ଭାବନା ରହିଛି।

କନ୍ୟା ରାଶି: ଆଜି କ୍ରୋଧ ଓ କଥାବାର୍ତ୍ତା ଉପରେ ନିୟନ୍ତ୍ରଣ ରଖନ୍ତୁ। ସ୍ୱାସ୍ଥ୍ୟ ପ୍ରତି ଯତ୍ନବାନ ହୁଅନ୍ତୁ ଏବଂ ଅଯଥା ବିବାଦରୁ ଦୂରେଇ ରୁହନ୍ତୁ। ପରିବାରରେ ମତଭେଦ ହେବାର ସମ୍ଭାବନା ଥିବାରୁ ଧୈର୍ଯ୍ୟର ସହ ପରିସ୍ଥିତିକୁ ସମ୍ଭାଳନ୍ତୁ।

ତୁଳା ରାଶି: ବନ୍ଧୁମାନଙ୍କ ସହ ଭ୍ରମଣ, ଖାଦ୍ୟପେୟ ଓ ମନୋରଞ୍ଜନରେ ଦିନଟି କଟିପାରେ। ବ୍ୟବସାୟିକ ସହଯୋଗୀଙ୍କ ସହ ସମ୍ପର୍କ ଭଲ ରହିବ। ମଧ୍ୟାହ୍ନ ପରେ କିଛି ଅସୁବିଧା ଓ ଅପ୍ରତ୍ୟାଶିତ ଖର୍ଚ୍ଚ ହୋଇପାରେ। ସ୍ୱାସ୍ଥ୍ୟ ପ୍ରତି ଧ୍ୟାନ ଦିଅନ୍ତୁ।

ବିଛା ରାଶି: ଆତ୍ମବିଶ୍ୱାସ ସହ କାର୍ଯ୍ୟ କଲେ ସଫଳତା ମିଳିପାରେ। ପାରିବାରିକ ଜୀବନରେ ସୁଖଶାନ୍ତି ରହିବ ଏବଂ ସ୍ୱାସ୍ଥ୍ୟ ଭଲ ରହିବ। କ୍ରୋଧ ଉପରେ ନିୟନ୍ତ୍ରଣ ରଖନ୍ତୁ। ବନ୍ଧୁ ଓ ଆତ୍ମୀୟଙ୍କ ସହ ଭ୍ରମଣର ଯୋଗ ରହିଛି।

ଧନୁ ରାଶି: ଆଜି ଭାବପ୍ରବଣତା ବଢ଼ିପାରେ। ଛାତ୍ରଛାତ୍ରୀମାନେ ପାଠପଢ଼ା ଓ କ୍ୟାରିୟର ସମ୍ବନ୍ଧୀୟ କାର୍ଯ୍ୟରେ ସଫଳତା ପାଇପାରନ୍ତି। ପରିବାରରେ ଶାନ୍ତି ରହିବା ସହ ବ୍ୟବସାୟରେ ଉନ୍ନତିର ସମ୍ଭାବନା ରହିଛି।

ମକର ରାଶି: ପରିବାରରେ ଶାନ୍ତି ବଜାୟ ରଖିବାକୁ ଅଯଥା ଯୁକ୍ତିତର୍କରୁ ଦୂରେଇ ରୁହନ୍ତୁ। ଧନ ଓ ସମ୍ମାନହାନି ନ ହେବା ପାଇଁ ସତର୍କ ରୁହନ୍ତୁ। ମଧ୍ୟାହ୍ନ ପରେ ସୃଜନଶୀଳ କାର୍ଯ୍ୟରେ ଆଗ୍ରହ ବଢ଼ିପାରେ।

କୁମ୍ଭ ରାଶି: ଆଜି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେବା ବେଳେ ଦୃଢ଼ ମନୋଭାବ ରଖନ୍ତୁ। ବନ୍ଧୁଙ୍କ ସହ ସାକ୍ଷାତ ଆନନ୍ଦଦାୟକ ହେବ। ସ୍ୱଳ୍ପ ଦୂରତାର ଯାତ୍ରା ହୋଇପାରେ। ଭାଇଭଉଣୀଙ୍କ ସହ ସମ୍ପର୍କ ଅଧିକ ନିବିଡ଼ ହେବ।

ମୀନ ରାଶି: ଆଜି କ୍ରୋଧ ଓ କଥାବାର୍ତ୍ତା ଉପରେ ସଂଯମ ରଖନ୍ତୁ। ନକାରାତ୍ମକ ଚିନ୍ତାରୁ ଦୂରେଇ ରହିବା ସହ ଖାଦ୍ୟପେୟ ପ୍ରତି ଧ୍ୟାନ ଦିଅନ୍ତୁ। ମଧ୍ୟାହ୍ନ ପରେ ମନରେ ସ୍ଥିରତା ଆସିବ ଏବଂ ହାତକୁ ନେଇଥିବା କାର୍ଯ୍ୟ ସମାପ୍ତ କରିପାରିବେ।

ଜ୍ୟୋତିର୍ବିଦ: ଭାବଗ୍ରାହୀ ଖଡ଼ିରତ୍ନ

ଯୋଗାଯୋଗ: ୯୪୩୮୧୫୨୬୨୭

ଟିପ୍ପଣୀ: ରାଶିଫଳ ପାରମ୍ପରିକ ଜ୍ୟୋତିଷ ଆଧାରିତ। ଏହାକୁ ନିଶ୍ଚିତ ଭବିଷ୍ୟବାଣୀ ଭାବେ ନ ନେଇ ସାଧାରଣ ସୂଚନା ଭାବେ ଗ୍ରହଣ କରନ୍ତୂ।

ଖଞ୍ଜଣି ଭଜନ ମାଧ୍ୟମରେ ପୋଷଣ ସଚେତନତା, କାଠବାରୀ ପଞ୍ଚାୟତରେ ଭାରତ ସଂଗଠନର କାର୍ଯ୍ୟକ୍ରମ

କେନ୍ଦୁଝର/ପାଟଣା, ୨୩/୧୦: କେନ୍ଦୁଝର ଜିଲ୍ଲା ପାଟଣା ବ୍ଲକ ଅନ୍ତର୍ଗତ ଏରେଣ୍ଡେଇସ୍ଥିତ ଭାରତ ସଂଗଠନ ପକ୍ଷରୁ କାଠବାରୀ ଗ୍ରାମ ପଞ୍ଚାୟତରେ ଖଞ୍ଜଣି ଭଜନ ମାଧ୍ୟମରେ ଏକ ପୋଷଣ ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଯାଇଛି। ଲୋକକଳା ଓ ସଙ୍ଗୀତ ମାଧ୍ୟମରେ ସାଧାରଣ ଲୋକଙ୍କୁ ପୋଷଣର ଗୁରୁତ୍ୱ ବିଷୟରେ ସଚେତନ କରିବା ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ଥିଲା।ଭାରତ ସଂଗଠନର ଏଏସ୍‌ପି କାଳନ୍ଦୀ ମହାକୁଡ଼ ଓ ତାଙ୍କ ସାଥୀମାନଙ୍କ ଦ୍ୱାରା ଆୟୋଜିତ ଏହି ସାଂସ୍କୃତିକ କାର୍ଯ୍ୟକ୍ରମରେ ଖଞ୍ଜଣି ଭଜନ ମାଧ୍ୟମରେ ପୋଷଣଯୁକ୍ତ ଖାଦ୍ୟ ଓ ସୁସ୍ଥ ଜୀବନଯାପନର ଗୁରୁତ୍ୱ ସମ୍ପର୍କରେ ଜନସାଧାରଣଙ୍କୁ ବାର୍ତ୍ତା ଦିଆଯାଇଥିଲା। ପାରମ୍ପରିକ ଲୋକକଳା ମାଧ୍ୟମରେ ସଚେତନତା ସୃଷ୍ଟି କରିବାର ଏହି ପ୍ରୟାସକୁ ଉପସ୍ଥିତ ଲୋକେ ପ୍ରଶଂସା କରିଥିଲେ।ଏହି ଅବସରରେ କାଠବାରୀ ଗ୍ରାମ ପଞ୍ଚାୟତର ସରପଞ୍ଚ ଶୁକବତୀ ଖଣ୍ଡେଇ, ଏଡିଇଓ ହରିଶ୍ଚନ୍ଦ୍ର ମହନ୍ତ, ଏପିସି ଶଙ୍କର୍ଷଣ ଗିରିଙ୍କ ସମେତ ଭାରତ ସଂଗଠନର ବିଭିନ୍ନ କର୍ମକର୍ତ୍ତା ଉପସ୍ଥିତ ରହି କାର୍ଯ୍ୟକ୍ରମରେ ସହଯୋଗ କରିଥିଲେ।ଲୋକକଳାଭିତ୍ତିକ ଏଭଳି ସଚେତନତା କାର୍ଯ୍ୟକ୍ରମ ମାଧ୍ୟମରେ ଗ୍ରାମାଞ୍ଚଳର ଲୋକଙ୍କ ନିକଟରେ ପୋଷଣ ସମ୍ପର୍କିତ ବାର୍ତ୍ତା ପହଞ୍ଚାଇବା ସହ ସୁସ୍ଥ ଜୀବନଯାପନ ପାଇଁ ସଚେତନତା ବୃଦ୍ଧି କରିବାରେ ଭାରତ ସଂଗଠନର ଏହି ପଦକ୍ଷେପ ପ୍ରଶଂସନୀୟ ହୋଇଛି।

ପାଟଣା ବ୍ଲକରେ ପଞ୍ଚାୟତ ପ୍ରତିନିଧିଙ୍କୁ କ୍ରୟ ପରିଚାଳନା ତାଲିମ

କେନ୍ଦୁଝର/ପାଟଣା, ୨୩/୧୦: କେନ୍ଦୁଝର ଜିଲ୍ଲା ପାଟଣା ବ୍ଲକ ଅଞ୍ଚଳର ସରପଞ୍ଚ, ପଞ୍ଚାୟତ ନିର୍ବାହୀ ଅଧିକାରୀ ଏବଂ ଏଡିଇଓମାନଙ୍କୁ କ୍ରୟ ପରିଚାଳନା ସମ୍ପର୍କିତ ତାଲିମ ପ୍ରଦାନ କରାଯାଇଛି। ପଞ୍ଚାୟତ ସ୍ତରରେ କ୍ରୟ ପ୍ରକ୍ରିୟାକୁ ସୁବ୍ୟବସ୍ଥିତ ଓ ନିୟମାନୁଯାୟୀ ପରିଚାଳନା କରିବା ଉଦ୍ଦେଶ୍ୟରେ ଏହି ତାଲିମ ଦିଆଯାଇଥିଲା।ଏହି ତାଲିମ କାର୍ଯ୍ୟକ୍ରମରେ ପାଟଣା ବ୍ଲକର ବିତ୍ତ ଅଧିକାରୀ ତଥା ଭାରପ୍ରାପ୍ତ ଏବିଡିଓ ପାର୍ବତୀ ସର୍ଦ୍ଦାର, ସହକାରୀ ଶ୍ରମ ଅଧିକାରୀ ଅମରେଶ କର, ବ୍ଲକ ସାମାଜିକ ସୁରକ୍ଷା ଅଧିକାରୀ ଅଭୟ ଚରଣ ଦେହୁରୀ, ବିପିସି ଜମାଲ୍ଲୁଦ୍ଦିନ ଖାନ ଏବଂ ସିପି ବେଦବ୍ୟାସ ମହାନ୍ତ ପ୍ରମୁଖ ଉପସ୍ଥିତ ରହି ପଞ୍ଚାୟତ ପ୍ରତିନିଧି ଓ କର୍ମଚାରୀମାନଙ୍କୁ ବିଭିନ୍ନ ବିଷୟରେ ତାଲିମ ପ୍ରଦାନ କରିଥିଲେ।ତାଲିମ କାର୍ଯ୍ୟକ୍ରମରେ ଜେମ୍ (GeM) ପୋର୍ଟାଲ ମାଧ୍ୟମରେ ଅନଲାଇନ୍ କ୍ରୟ ପ୍ରକ୍ରିୟା, ବିଭିନ୍ନ ଅର୍ଥରାଶିର ସାମଗ୍ରୀ କ୍ରୟ ପାଇଁ ନିୟମ, ସରପଞ୍ଚ ଓ ସମ୍ପୃକ୍ତ କମିଟିର କ୍ରୟ କ୍ଷମତା ଏବଂ ଟେଣ୍ଡର ପ୍ରକ୍ରିୟା ସମ୍ପର୍କରେ ବିସ୍ତୃତ ଆଲୋଚନା ହୋଇଥିଲା।ପଞ୍ଚାୟତ ସ୍ତରରେ କ୍ରୟ ପରିଚାଳନା ସମୟରେ ନିୟମାବଳୀ ପାଳନ, ଉପଯୁକ୍ତ ପ୍ରକ୍ରିୟାରେ କ୍ରୟ କାର୍ଯ୍ୟ ସମ୍ପାଦନ ଏବଂ ପ୍ରତିନିଧି ଓ କର୍ମଚାରୀଙ୍କ ଦାୟିତ୍ୱ ସମ୍ପର୍କରେ ଏହି ତାଲିମ ଗୁରୁତ୍ୱପୂର୍ଣ୍ଣ ହୋଇଥିଲା।

କପୁଣ୍ଡିରେ ଭକ୍ତିମୟ ପରିବେଶରେ ମା’ ଦୁର୍ଗାଙ୍କ ଭସାଣି ଉତ୍ସବ

କେନ୍ଦୁଝର/ପାଟଣା, ୨୩/୧୦: କେନ୍ଦୁଝର ଜିଲ୍ଲା ପାଟଣା ଥାନା ଅନ୍ତର୍ଗତ ସାହାରପଡ଼ା ବ୍ଲକର କପୁଣ୍ଡି ଗ୍ରାମରେ ଶାରଦୀୟ ଦୁର୍ଗାପୂଜାର ଅନ୍ତିମ ପର୍ବ ମା’ ଦୁର୍ଗାଙ୍କ ଭସାଣି ଉତ୍ସବ ଶୁକ୍ରବାର ଭକ୍ତିମୟ ପରିବେଶରେ ସମ୍ପନ୍ନ ହୋଇଛି। ପାରମ୍ପରିକ ଭଜନ ଓ କୀର୍ତ୍ତନରେ ଗ୍ରାମରେ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଥିବା ବେଳେ ଶ୍ରଦ୍ଧା ଓ ଭକ୍ତିର ସହ ମା’ଙ୍କୁ ବିଦାୟ ଦିଆଯାଇଥିଲା।ପୂଜାର କର୍ତ୍ତା ଅରୁଣ କୁମାର ବେଜ ଓ ସହଯୋଗୀ ଅର୍ଜୁନ କୁମାର ପୃଷ୍ଟିଙ୍କ ଉପସ୍ଥିତିରେ ପୂଜକ ଅନ୍ତର୍ଯ୍ୟାମୀ ଶତପଥୀ, ଶରତ ଆଚାର୍ଯ୍ୟ, ଗୋପାଳ ମିଶ୍ର ଓ ଗଦାଧର ଶତପଥୀ ପ୍ରମୁଖ ପୂଜାକାର୍ଯ୍ୟ ସମ୍ପନ୍ନ କରିଥିଲେ।

 ପୂଜାର ବିଭିନ୍ନ ବିଧିବିଧାନ ଶେଷ ହେବା ପରେ ପାରମ୍ପରିକ ଭଜନ ଓ କୀର୍ତ୍ତନ ମଧ୍ୟରେ ମା’ ଦୁର୍ଗାଙ୍କ ଭସାଣି ଉତ୍ସବ ଆୟୋଜିତ ହୋଇଥିଲା।କପୁଣ୍ଡି ମା’ ଦୁର୍ଗା ଯୁବକ ସଂଘ ପକ୍ଷରୁ ଆୟୋଜିତ ଏହି ଉତ୍ସବରେ ସଂଘର ସଭାପତି ଶମ୍ଭୁନାଥ ସେଠୀଙ୍କ ସମେତ ଅନ୍ୟାନ୍ୟ କର୍ମକର୍ତ୍ତା ଓ ଗ୍ରାମବାସୀ ସହଯୋଗ କରିଥିଲେ।ଧାର୍ମିକ ଶ୍ରଦ୍ଧା, ପାରମ୍ପରିକ ରୀତିନୀତି ଓ ସାମୂହିକ ସହଯୋଗର ଏହି ଉତ୍ସବକୁ ନେଇ ସ୍ଥାନୀୟ ମହଲରେ ପ୍ରଶଂସା ପ୍ରକାଶ ପାଇଛି। କପୁଣ୍ଡି ଗ୍ରାମର ଏହି ଦୁର୍ଗା ଭସାଣି ଉତ୍ସବ ଗ୍ରାମବାସୀଙ୍କ ଏକତା, ଭକ୍ତିଭାବ ଓ ସାଂସ୍କୃତିକ ପରମ୍ପରାର ସୁନ୍ଦର ପ୍ରତିଫଳନ ହୋଇଛି।

ଶୋକାକୁଳ ପରିବେଶରେ ପୂର୍ବତନ ବିଧାୟକ କାହ୍ନୁ ଚରଣ ନାଏକଙ୍କ ଅନ୍ତିମ ସଂସ୍କାର

କେନ୍ଦୁଝର/ପାଟଣା, ୨୩/୧୦: ପୂର୍ବତନ ପାଟଣା ବିଧାୟକ କାହ୍ନୁ ଚରଣ ନାଏକଙ୍କ ୭୭ ବର୍ଷ ବୟସରେ ପରଲୋକ ପରେ ଶୁକ୍ରବାର ଶୋକାକୁଳ ପରିବେଶରେ ତାଙ୍କର ଅନ୍ତିମ ସଂସ୍କାର କରାଯାଇଛି। ଗତକାଲି ବିଳମ୍ବିତ ସନ୍ଧ୍ୟାରେ ତାଙ୍କର ଦେହାନ୍ତ ହୋଇଥିଲା। ତାଙ୍କର ଶେଷ ଦର୍ଶନ ପାଇଁ ବହୁ ରାଜନୈତିକ ନେତା, ଜନପ୍ରତିନିଧି ଓ ବିଶିଷ୍ଟ ବ୍ୟକ୍ତି ଏକତ୍ରିତ ହୋଇ ଅନ୍ତିମ ଶ୍ରଦ୍ଧାଞ୍ଜଳି ଜଣାଇଥିଲେ।କେନ୍ଦୁଝର ସାଂସଦ ଅନନ୍ତ ନାୟକଙ୍କ ସମେତ ପୂର୍ବତନ ମନ୍ତ୍ରୀ ତଥା ଘଷିପୁରା ବିଧାୟକ ବଦ୍ରୀ ନାରାୟଣ ପାତ୍ର, ଜିଲ୍ଲା ବିଜୁ ଜନତା ଦଳ ସଭାପତି ଆଶିଷ ଚକ୍ରବର୍ତ୍ତୀ, ପାଟଣା ବିଧାୟକ ଅଖିଳ ଚନ୍ଦ୍ର ନାଏକ, ପାଟଣା ବ୍ଲକ ବିଜେଡି ସଭାପତି ମାଧବାନନ୍ଦ ପୃଷ୍ଟି, ଗୋଣ୍ଡ ସମାଜର ଜିଲ୍ଲା ସଭାପତି ପ୍ରଫୁଲ୍ଲ କୁମାର ସିଂହ ଓ ସାହାରପଡ଼ା ବ୍ଲକ ବିଜେଡି ସଭାପତି ଦିଲ୍ଲୀପ ସାହୁ ଶେଷ ଦର୍ଶନ କରିଥିଲେ।ସେହିପରି ପୂର୍ବତନ ପାଟଣା ବ୍ଲକ ଅଧ୍ୟକ୍ଷ ବିଶ୍ୱନାଥ ନାୟକ ଓ ସୁକାନ୍ତି ନାଏକ, ପୂର୍ବତନ ସାଂସଦ ମାଧବ ସର୍ଦ୍ଦାର, ଜିଲ୍ଲା ବିଜେଡି କାର୍ଯ୍ୟକାରୀ ସଭାପତି ପ୍ରମୋଦ ପଟ୍ଟନାୟକ, ବରିଷ୍ଠ ବିଜେପି ନେତା ଅଂଶୁମାନ ସବୁଜ ମହାନ୍ତ ବର୍ମା ଓ ରାଧାକାନ୍ତ ମହାନ୍ତ, ବରିଷ୍ଠ ନେତା ଭବାନୀ ଶଙ୍କର ନାଏକ ଓ ପୃଥ୍ୱୀରାଜ କୁଅଁର, ଝୁମ୍ପୁରା ବ୍ଲକ ଅଧ୍ୟକ୍ଷା ମାଳତୀ ନାଏକ, ପୂର୍ବତନ ରାଜ୍ୟସଭା ସାଂସଦ ରାହାସ ବିହାରୀ ବାରିକ, ପୂର୍ବତନ ବିଧାୟକ ପ୍ରାଣବଲ୍ଲଭ ନାୟକ ଓ ସୁବର୍ଣ୍ଣ ନାୟକ ଏବଂ ଇଂ. ବିଦ୍ୟାଧର ଦାଶଙ୍କ ସମେତ ବହୁ ବ୍ୟକ୍ତି ଶେଷଯାତ୍ରାରେ ସାମିଲ ହୋଇଥିଲେ।ସ୍ୱର୍ଗତ କାହ୍ନୁ ଚରଣ ନାଏକଙ୍କ ପାର୍ଥିବ ଶରୀରକୁ ଏକ ସୁସଜ୍ଜିତ ଯାନରେ ଗ୍ରାମରେ ଶୋଭାଯାତ୍ରାରେ ପରିକ୍ରମା କରାଯିବା ପରେ ଶ୍ମଶାନକୁ ନିଆଯାଇଥିଲା। ଭଗପଶି ଗ୍ରାମରେ ଥିବା ତାଙ୍କ ନିଜସ୍ୱ ଜମିରେ ଶୋକାକୁଳ ପରିବେଶରେ ଅନ୍ତିମ ସଂସ୍କାର ସମ୍ପନ୍ନ ହୋଇଥିଲା।ବଡ଼ପୁଅ ଲୋକନାଥ ନାଏକ ମୁଖାଗ୍ନି ଦେଇଥିବା ବେଳେ ମଧ୍ୟମ ପୁଅ ସତ୍ୟବ୍ରତ ନାଏକ, ସାନପୁଅ ତଥା ପୂର୍ବତନ ବିଧାୟକ ଜଗନ୍ନାଥ ନାଏକ ଓ ଅନ୍ୟ ଆତ୍ମୀୟସ୍ୱଜନ ଅନ୍ତିମ ସଂସ୍କାର କାର୍ଯ୍ୟରେ ଉପସ୍ଥିତ ଥିଲେ। ତାଙ୍କ ବିୟୋଗରେ ଅଞ୍ଚଳରେ ଶୋକର ଛାୟା ଖେଳିଯାଇଛି।